المقادير
دجاجة من وزن كيلو و800 g مغسولة ومنزوعة الجلد
2حبة بصل مقطع نصف حلقات
ربطة صغيرة بقدونس وقزبر
نصف معلقة صغيرة كل من
ملح/ابزار/كركم اللى هو زعفران عرق/دويمة صغيرة زعفران الحر/ اسكنجبير/1 عود قرفة
زيت تقريبن نصف كاس صغير
كنقليو البصل والتوابل مع الدجاج وكنمرقو بزوج كيسان كبار ديال الماء ونحطو فالجانب الربيع مربط
نسدو على الدجاج حتى يطيب ونهزوه جانبا
وفالمرق نضيف كاس متوسط زبيب مرقد فماء زهر كنصفيوه ونقطعوه ونزيدوه على المرق ونزيدو معلقة سكر سنيدة
ونصف معلقة صغيرة قرفة مطحونة ونخليو المرق حتى يشرب مزياان ويتعلك وينشف ويولي عندنا تفاية نخليوه جانبا
نحيدو اللحم من العظم
كيلو ديال الروز مرطب فالماء واحد ساعتين
كنصفيوه ونعملوه فالماء مملح باش اتصلق نصف صلقة
نشوفوه طاب نصف صلقة بمعنى دخلو طياب مبقاتش الحبة كتبان بيضاء من داخل
كنصفيوه فالكسكاس مزياان عاد نخويوه فقصعة ونضيفه عليه زبدة ونحركوه بايدينا مزيان باش اشرب الزبدة وندوقوه ايلا خاصاه الملحة نرشوه بشوية ملح ورشيشة من الماء ثم نردوه للكسكاس باش افور مزيان
عند التقديم كنخويو الروز فالقصعة ونضيفه عليه نصف علبة حليب مركز غير محلى
و2 معالق سكر كلاصي السكر على حسب الحلاوة
نحركوه حتى يشرب الحليب والسكر
ناخدو الاطار المخصص للحلويات نعملو فيه تفريشة من الروز
ثم تفريشة من الدجاج ونرشو فوق منه بلوز مقلي ونوزعو فوق منه التفاية معسلة
ونعاودو نغطيوه بتفريشة اخرى ديال الروز ونوركو مزيان بايدينا باش ياخد شكل الإطار الدائري
نزينوه بلقرفة من فوق كما هو موضح فالصورة واللوز مصلوق ومقشر ومقلي
ونزولو الاطار بشوية
الجوانب زينتهم بالبيض زولت منه الاصفر وعمرته بالتفاية المعسلة وقدمته
إرسال تعليق